今日帶沙循，五比零贏左呂明才。終於可以贏番英Sir一次！我要証明我用心的教法係戰勝佢個隻Hea教，佢只不過有班好人腳，唔係佢教得好而贏波，我始終會贏佢的。

        今日望住班仔比賽，我諗番好多野，諗番以前校隊練波的時光，諗番踢學界的情景，諗起隊友們的激情，諗起上帝的關顧。望住個足球，佢帶俾我好多野，朋友，快樂，自信，成就感。雖然唯獨沒有金錢…（當然還沒有帶俾我女朋友啦！），但係呢d野用錢買唔到的。世界很現實，沒有錢好難生活，我自已唔食，家人都要食飯咖。男人一定要有事業，我都20歲人，仲唔快d開始，將來唔好話有家庭，阿媽都養唔掂，就真係很失敗啦。我其實沒諗過要發達，生活穩定，屋企齊整，個個月有錢淨我就好開心架啦。但係偏偏足球就係俾唔到呢樣野俾我。

        好多有心人成日鼓勵我，叫我俾心機捱到上位，生活就好好多架啦。有邊個保証係呢個咁樣的球圈，靠關係唔係靠能力靠努力才能上到位的球圈，我可以上到位呀！？仲有我可以踢到幾耐呀，之後又點樣呀！？我為左足球，差d同家人斷絕關係，差d無錢俾番屋企，放棄了讀書，放棄去考紀律部隊。我連女仔都唔敢去識呀，因為我自已都未搞得掂，我唔想累其他人。

        有好多時我都想諗著轉行，但係又唔捨得足球的樂趣，以前努力的時光，教波個班細路，但係偏偏我就無咁簡單的要求。好多人叫我信上帝，憑信心。坦白講，我對前路真係好無信心。大佬，你教我點做啦。

練習時間更新！

沙循八月集訓時間表：

3/8(一)曾大屋4:30-6:00,7/8(五)馬仿4:30-6:00

10/8(一)曾大屋4:30-6:00,14/8(五)曾大屋3:00-4:30

17/8(一)馬仿4:30-6:00,21/8(五)馬仿3:00-4:30

24/8(一)曾大屋4:30-6:00,28/8(五)曾大屋4:30-6:00

31/8(一)馬仿4:30-6:00

敬請各隊員注意及forward出去。